বৈধব্যৰ শুদ্ধিকৰণ মন্ত্ৰ থকাহেঁতেন
শ্যামলী ওৰণিৰ উম লৈ
আকৌ এবাৰ শিহৰিত হ’লহেঁতেন
ভাগ্যৰেখাৰ স্তব্ধ হৃদপিণ্ড!
ৰুক্ষ শিলৰ হেঁচাত
সেপধুকি থকা তগৰ-মালতীয়ে
ফাগুনক মেৰিয়াই সাঁতুৰিলেহেঁতেন
হেঁপেহুৱা অনুভৱৰ উমাল বক্ষত,
স্বপ্নীল ৰূপালী মুকুতাই
উটুৱাই নিলেহেঁতেন
ফেঁকুৰি-উচুপি ভাগৰি পৰা ওঁঠৰ
গাঢ় ছাইৰঙী আভৰণ৷
নঙলাৰ আগেদি পাৰ হৈ যোৱা
শিশুজাকৰ হাই-উৰুমিত
পুনৰ সাৰ পায়
বেলিৰ স’তে ডুব যোৱা দুখুনীৰ বসন্ত…
শাঁখা ভঙা কৰ্কশ শৱদত
সন্ত্ৰস্ত জীৱন, কাৰাৰুদ্ধ যৌৱনৰ বিমূৰ্ত ক্ষণ!
গৌতম মালাকাৰ ,কৰিমগঞ্জ
http://storytoday.incategory/poem/
