আলিবাটটো বৰ সুন্দৰকৈ দেখি
মোৰ খিড়িকীৰে,
নিতৌ ন ন বাটৰুৱাৰ অৱগাহন
লানি লানি বাহনৰ
ইঞ্জিনৰ মাত।
ব্যস্ততাৰ সেই চাৰিআলিটো
ৰিণিকি-ৰিণিকি দেখো…
সন্ধিয়া যেন অদূৰৰ বৰগছডাল
দানৱ হৈ পৰে….মোৰ খিড়িকীৰে।
পূৰ্ণিমাৰ জোনটোৰ লগত মোৰ
বন্ধুত্ব পুৰণা…
সন্ধ্যা তৰা!!ইটো মোৰ প্ৰাণৰো আপোন
পুৱা-আবলি শালিকী কেইটাৰ
বিস্কুট খোৱাৰ মেল
নিদিয়ালৈকে টান সুৰ …
উৎস?মোৰ খিড়িকী
বাটৰুৱাবোৰ এদিন চিনাকী হৈ
বুকুত ঘৰ সাজে।
আৰু মই চাই ৰওঁ অহা-যোৱাৰ
নিদিষ্ট সময়বোৰ…
মোৰ খিড়িকীৰে
ভৰ দুপৰীয়া হাতত সাৰে ভৰিত সাৰে
অহা শৈশৱৰ লগবোৰৰ
সংযোগ স্থল মোৰ খিড়িকী…
যৌৱনৰ ভৰুণ হৃদয়ৰ বাৰ্তাবোৰ
নীলা খামৰ গুলপীয়া কাগজত
আদান-প্ৰদান …এই খিড়িকীৰে
বিশ্ব-বিশ্বায়ণ, আকাশৰ নীলাভবোৰ
আৰু সৰগীয় সুনীল মাল্যৰ অৱলোকন
তথা জিজ্ঞাসাৰ তুংগত
অৱতৰণ …এই খিড়িকীৰে…
